انا عبيط

ليه الناس فاكرة نفسها اذكية جدا؟؟؟ ده سؤال محيرني !!! ناس بتتعامل قدامك و انت بتعمل عبيط ... انا بعمل عبيط ... و اخاليهم يعيشوا الدور... ناس بتكذب .. و بخاليهم يصدقوا اني مصدقهم و انا واثق انهم كذابين حتي لو مافيش في ايدي دليل .. بس الدليل القوي عندي .. يمكن ناس كتير مش بتستوعب اللي بقوله ده و ناس تانيه مش معترفه بيه.. في مقوله بتقول :" قلب المؤمن دليله" انا مش بقول علي نفسي مؤمن .. انا الحمد لله بحاول اكون مؤمن .. المهم اني لما حد بيكذب علي بكون حاسس ان ده كذب و الحمد لله بيطلع في الاخر كذب بجد و احساسي صح ... كذا موقف حصل بيكون احساسي ان ده كذب و عقلي يقولي لاء ... عقلي بيفكر زي- كراجل علمي – ان لازم يكون في دليل و براهين عشان الاستنتاج يكون مضبوط و علي النقيد احساسي و قلبي اللي هما دليل اي مؤمن... بس في الاخر احساسي هو اللي بيوصلني للدليل و منه الاستنتاج اللي احساسي وصلني ليه في الاول...

كمان الذكاء مش في الكذب و التحوير .. لاء الذكاء برده في المعاملة .. ناس بتتعامل معاك بأسلوب رخيص و يفتكروا ده ذكاء.. مش هاخصص... ولا هاحدد عشان الامثلة كتير ... بس أنا ببقي فاهم و عارف و بحاول اعمل نفسي مش فاهم و مش عارف عشان اعرف اكتر...

من ضمن اساليب الذكاء.. التمثيل.. في مرة أتسألت سؤال عبقري... :" تعرف منين ان دي شخصيتي الحقيقة ؟ مش ممكن اكون بمثل عليك؟؟؟ مش ممكن اكون ممثله عبقريه و اخاليك تصدق؟؟" ده رد صديقة علي لما قلتلها اني فاهمها... طيب.. السؤال ده بجد عبقري .. بس الرد عليه سهل قوي و بجملة واحده :" قلب المؤمن دليله" ... التمثيل مافيش اسهل منه.. وانا واحد من الناس جربته علي خشبة المسرح قدام مئات.. و علي فكرة التمثيل سهل جدا... طالما الموهبه موجوده... بس صعب جدا قدام ناس قريبه من ربنا قوي... و احب أقول لكل الناس ... مثلوا ... استمروا .... كله قدامي شفاف ... ولو ماشفتش دلوقتي .. هاشوف كمان شوية ... مش بكره ... لاء كمان شوية

انا ليه سيبتها

جالي تليفونات و رسايل كتير من أول ما عملت اني "سينجل" و لغيت "الريلاشنشيب" و كنت دايما اجاباتي بتكون ديبلوماسية زي .."محصلش نصيب"  و "مافيش تفاهم" و الخ بقي.. بس من فترة قاعدت افكر كتير .. هو انا ليه اخبي.. طيب مانا افضحها . بس للاسف أخلاقي ماتسمحليش اني اعمل كده.. بس هي ماسكتتش و قاعدت تستفز في.. وانا عمال اطنش و اقول انت الكبير وفضلت اهدي في نفسي لحد ماقررت اني افضحها... وانا عارف الناس هنا مستنيه اي فضيحة عشان تفرح...

الهانم العاقلة الراسية اللي كانت ناوية علي جواز مني تبقي..... تبقي..... تبقي... ياربي مش قادر اقولها... تبقي زمالكاوية... ايوة زمالكاوية اصيلة كمان... وانا اللي كنت فاكرها أهلاوية؟؟؟ ازاي انا سامح الاهلاوي سليل الاهلاوية و اهلاوي من ايام تحتمس بو تريكه امنحطب اتجوز واحده زمالكاوية؟؟؟؟؟

فقررت و بقلب مرتاح و ضمير راضي اني اسيبها لحالها و كفاية شيكا و ابو صلعه عليها


و شكرا


ملحوظة: النوت دي من خيالي

للرجالة بس .. و يمكن البنات

أصلها بتفرق..... دي عنوان الأغنية الجديدة لعمرو دياب.. ولأول مرة عنوان اغنيه يشدني و يخالني افكر.. يعني ايه "أصلها بتفرق في حياتك واحدة"؟؟ قاعدت أفكر .. وأفكر .. وأفكر .. قعدت اعد كام واحدة في حياتي فرقت؟؟؟؟؟ ومين هي اللي هاتفرق..
صعب قوي انك تلاقي واحدة تفرق معاك ... طيب بيقوولوا وراء كل عظيم امرأة... طيب ما في رجالة كتير ضاعوا عشان امرأة !!!! طيب يعني زي ماهي بتصنع عظماء برده يتخسف براجل الارض...
فضلت افكر .. لحد ملاقيت مخي شد .. وانا لما بحتار بقوم اشغل اي موسيقي كلاسيك من أعمال موتزارت او شوبان.. موسيقي بجد مش الموسيقي اللي بنسمعها .. ماعلينا
لما ركزت.. وصلت مع نفسي لنقطة مهمة.... اللي بتفرق معايا .. تخاليتها... عشت معاها... حطتها في مواقف صعبة.. كل ده طبعا في خياللي و صلت ليها....
اللي بتفرق معايا هي اللي تختارك عشانك اولا مش عشان حاجة تانية.. ايه الحاجه التانية دي؟؟؟ دي بتفرق من واحدة للتانية.. واحدة ممكن تختارك عشان انت فنان و مشهور و هي بتحب الاضواء و تحب تكون في الصورة مع جوزها...او تختارك عشان انت دكتور و بتكسب كويس و كمان ليك بريستيج... او واحدة تختارك عشان باباك سايبلك المصنع و هاتورثه قريب ان شاء الله (يابختك يا عم) او واحده تختارك لانك انت الوحيد اللي رضيت بظروفها اللي ميرضهاش حد علي نفسه.. ووحدة تانيه شايفاك سلمة في حياتها ... او واحدة تعبت بقي من الكفاح و عايزة ترتاح فتقوم تختارك بغض النظر عن ظروفك اذا كنت متجوز و عندك عيال او فاضلك شويتين و هاتموت و هاتورث هي الشقة .... الخ
اللي بتفرق معايا لازم تكون اولا بنت ناس ليها خير في اهلها عشان اللي مالهوش خير في اهله مالهوش خير في حد.. اللي بتفرق معايا لازم تكون مستعدة للكفاح زي مانا مستعد اني اموت نفسي عشانها واخاليها مش محتاجة حاجه من فلوس و حب و حنان و اطمئنان... اللي ععاتفرق معايا هي اللي هاتختارني من غير تفكير في مميزات و عيوب و ياتري هاستحمله و هايستحملني ولا لاء؟؟؟؟؟ اللي بتفرق معايا هي اللي تحب عيوبي زي مميزاتي زي مانا هاحب عيوبها اكتر من مميزاتها... اللي بتقفرق معايا هي اللي تخلقلي الجو الصحي للتركيز و النجاح و تكون سند لي في المصائب قبل الفرح.... اللي تفرق معايا هي اللي ماتحطنيش في وضع مقارنة مع غيري.. لانه اصلا مافيش وجهه مقارنة بين الناس و بعضها كله بيكمل التاني

و يارجالة .. اللي تفرق معاكم هي اللي من نظرة واحدة تقول هي دي.. هي اللي تحس معاهه انك ملك
يارجالة... اللي ماتفرقش معاكم هي اللي انت تديها كل حاجة و هي ولا علي بالها و ماتعملش ليك اي حاجة

و بس

انا راجل مشفر

بسمع دلوقتي و بالصدفة السيمفونية السابعة لبتهوفن (الافتتاحية الثانية)... مش قادر اوصف قد ايه انا بعشقها... بعشقها لاني بحس نفسي فيها ... بتبدأ بصوت ضعيف خافت .. و ده بكون أنا في اي علاقة جديده بدخلها .. و بعد كده الموسيقي تقوي و تعلي تدريجيا لغايه صوت عالي قوي .. و هو ده حالي لما بوصل لمنتهي الحب ... بحس نفسي قوي في السيمفونية دي ... بتقطيع الموسيقي و الجمل الموسيقيه فيها لغايه مايوصل للبدايه تاني بس مش بنفس التعبير  (Expression) بيكون متوسط الحده .. وده فعلا أنا ... لما كنت مرتبط زمان .. بواحده زي الملاك (شكلا و صفة و كل شئ) .. قالتلي كلام مافهمتهوش ساعتها و افتكرت ان عشان اختلاف اللغه خلاني مافهمش هي تقصد ايه .. بس دلوقتي عرفت انه مش اختلاف اللغه .. المهم قالتلي: "أنت غريب... أنت كمية كبيرة من المشاعر و الاحاسيس و الرومانسية و في نفس الوقت تحمل من القوة و الصلابة و جمدان الشعور مايوازي مشاعرك الرومانسية ... انا حاسسه معاك بأمان... ماحستهوش حتي مع اهلي ."
مافهمتش الكلام ده ساعتها .. بس دلوقتي فهمت او اعتقد اني فهمت... هي فهمتني قوي.. فهمتني بجد مش زي ما اي حد تاني بيفهمني او بيحاول يفهمني او بيقنع نفسه انه فهمني.. عشان كدا اي حد يجي يقولي انا فاهمك بسكت مش بتكلم.. عشان لسه محدش فهمني .. لسه ماجتش البنت اللي تفهمني و تعرف تتعامل معايا... في علاقاتي الفاشلة اللي مرت .. سبب الفشل ان البنت تحس انها فهمتني .. و تتعامل معايا علي هذا الاساس .. بس لما تتعمق اكتر معايا تحس اني مش انا اللي عرفته علي الرغم انه انا من اول يوم لاخر يوم .. علي طبيعتي .. مش بمثل مش بلبس قناع .. انا هو انا.. بس هي اللي مش هي ... هي اللي فهمتني غلط...
حتي اصحابي - او اللي فاكرين نفسهم اصحابي-  ساعات بيستغربوا من ردة فعلي و بعضهم بيستعجب انه حاسس انه معرفنيش ... هو فعلا ماعرفنيش .. وزي ماقلتلي اول حب في حياتي اني انا راجل غير عادي ... راجل مشفر .. مش اي حد يفهمك مهما كان ذكي... هذا أنا




للاستماع للسيمفونية
http://www.youtube.com/watch?v=bqtPVEuAbzM