بسم الله الرحمن الرحيم
رسالة من ثائر للمجلس العسكري
الي السادة أعضاء المجلس العسكري
تحية طيبة و بعد,,,
انا هاتكلم باللغة العامية بعيد عن اللغة العربية الفصحي المعقدة اللي مش بفهم منها انتوا عايزين ايه.. مع كامل احترامي ليكم و مع كامل تقديري لدوركم إلا اني مش فاهمكم .... حركتكم بطيئة .... كلامكم عايم و غامض .. مش بتتحركوا عشان تمنعوا الثورة المضادة مما يثير الشبهات انكم انتم و راءها .. انا بثق فيكم جدا .. بس رصيدكم عندي خلاص .. بح .. خلص بعد اللي حصل امبارح يوم الجمعة/السبت 8/9 ابريل ... انا قريت بيانكم .. بتقولوا بلطجية هما اللي قاموا بأعمال تخريب.. اقولكم لأ .. انا اصحابي الثوار مش بلطجية ..وشهود العيان قالوا ان اللي كانوا في الميدان مش بلطجية... أرجوكم مزيد من الشفافية .. مزيد من الحركة لو كنتم فعلا بتدعموا الثورة .. لو كنتم فعلا مع الثوار مش مع المخلوعين ... و ارجوكم جاوبوا علي اسألتنا- نحن الثوار- ليه لحد دلوقتي متمتش محاكمة مبارك و رجالته؟!!! --- التحقيق في موقعة الجمل وصل لايه؟؟؟ التحقيق في تعذيب الشرطة العسكرية لمعتصمي التحرير وصل لايه؟؟ ليه بتدوا فرصة للثورة المضادة انها تشتغل و تهيألها الجو الخصب لده؟؟؟... ايها المجلس العسكري... اقعد مع القيادات الشبابة قبل السياسية .. اسمعهم شوفوا عايزين ايه ... مع اني عارف انهم عايزين مجلس رياسي بس برده اقعودا معاهم .... ارجوكم.
رسالتي للثوار اخواتي:
خالوا بالكم .. فكروا كويس قبل اي فعل ... الجيش ده اخرنا .. لو المؤسسة دي حصل فيها فوضى قولوا علي البلاد السلام ... و عايز انبهكم لحاجة .. إسرائيل مش هاتعقد كدا علي طول ساكته .. ده اذا كانت اصلا لسه ساكته.. اسرائيل مش مبسوطة ان "الجيش و الشعب ايد واحدة" سيبكم من الفيديوهات المضروبة اللي بتجيلنا من بره ... و اتأكدوا من كل ضابط جيش يقولوكم اي حاجة .. اي انقلا ب جوه الجيش مش في مصلحتنا .. ده في مصلحة الصهاينة... ويا ضباط الجيش المنتمين للثوار .. عايز تشاركنا اهلا وسهلا بيك .. بس ارجوك شاركنا بالزي المدني
وليس العسكري.. قواتنا المسلحة ليها هيبة و لازم تفضل هيبتها مصانة. و ارجوكم ماتشمتوش فينا مبارك و اعوانه.
والله الموفق و المستعان
