ليله غاب فيها القمر

خرجت كالعادة كل يوم بعد الساعة 10 مساءا اتمشي شوية و اروح "اون ذي رن" اشربلي المشروب المفضل هناك و الحمد لله اني ماقبلتش حد اعرفه لاني كنت محتاج اسمع مش اتكلم.. محتاج اسمع نفسي شوية.. ايوة اسمع نفسي.. اسمع الشخص اللي جوايا بيقولي ايه.. شايفني ازاي؟؟؟ شايف اللي حوالي ازاي؟؟؟ من زمان عمًال يكلمني .. عمالي دوشه و انا عمال بسكت فيه
و في عز لحطات تفكيري ظهرلي واحد من تحت الارض... لاقيته جايلي و بيسلم علي
ساااااااامو ازيك؟؟؟؟
اهلا انا تمام!!!! هو لاحظ علامات التعجب اللي ظهرت علي
انت مش عارفني؟ اخص عليك !!!! لاقيت انه بدأ يزعل .. رديت اني فاكره بس مش قوي... هو الصراحه ملامحه مش غريبة عليً هو طولي تقريبا ... قمحاوي و شعره طويل.. رفيع.. جسمه متناسق شوية.... مش لابس نضارة.. كتفه عريض.. في نفس عمري الشخص ده انا فاكر اني شفته قبل كدا.. اعرفه.. كلمته قبل كده....
المهم قاعد يفكرني بيه بس كالعاده مافتكرتش.. خلصت المشروب بتاعي و قلت امشي بقي عشان عايز اتمشي .. لاقيته ماشي معايا وعمال يحكيلي عن زمان و ايام زمان لما كنناااا صغيريييين !!!! انا فاكر اللي بيقوله بس زي مايكون كدا الصورة مش واضحة ..
فجأه و انا ماشي رايح ناحية اكتر مكان بحبه و اللي انا ساكون جنبه ... الهرم ... ماشي جنب الهرم رايح ناحية ميدان الرماية.. لاقيته سكت فجأه و قالي مالك ملامحك حزينة ليه؟!!!! استغربت قوي من سؤاله و بصيتله قوي قلتله ايه ده؟؟!! هو انا حزين؟؟؟ و ضحكت ضحكة صفرا.. قالي اه هو انا مش عارفك؟؟!!! مالك؟ قلتله مافيش يا عم الحج انت عايز تضايقني و خلاص.. اتحرك من علي شمالي و بقي علي يميني.. قالي لاء .. انت حزين .. مش علي انا .. انت وحيد؟؟ قلتله لاء عندي اخ و اختين و.... قاطعني و قالي : انت هاتستعبط.. اقصد انت حاسس بوحده؟؟؟ قلتله لاء انا تمام.. مصدقش و قالي :انت حاسس بوحده رغم انك حواليك ناااااااس كتير.. طيب مش بترد عليهم ليه؟؟؟!!.. بصيتله قوي و استغربت و سالته عرف منين؟؟؟ قالي حاسس بكدا... بيكلمني و هو عمال يتنقل من علي يميني لشمالي .. عايز يعرف مالي.. بصراحه اتخنقت منه.. بصيت للسما بدعي ربنا يخلصني منه .. ولفت نظري انه مافيش قمر!!!! فكرت هو احنا لسه في اول او اخر الشهر العربي.. وانا بحاول افتكر لاقته قطع تفكيري و قالي : ايه مش لاقي القمر؟؟؟ قلت لنفسي ايه الواد ده؟؟؟؟ كنت عايز اززعق واقوله ارحمني.. بصيت له.. قالي مش هاسيبك الا لما تروق.. قلتله بنرفذه :"ياعم انا كويس" وقف قدامي و مسكني من كتفي وواقفني قدام مرايا مطعم وقالي بص... شايف نفسك؟؟؟ انت كدا كويس؟؟؟ انت كدا سامو اللي اعرفه؟؟؟بصيت.. و سرحت .. و كلمت نفسي.. وقلت لاء مش انا .. يابن الايه .. رد علي و قالي شوفت بقي انك عارف انك مش انت؟؟؟ بصيت له قوي.. قلتله هو انا اتكلمت بصوت عالي .. قالي مش لازم تتكلم بصوت عالي عشان اسمعك.. فجأة سمعت صوت فرمله عربيه .. و حصلت حادثة .. العربيه دخلت في الجزيرة اللي في الوسط اللي بتقسم الشارع قدام فلفلة .. بصيت علي العربيه و جيت اكلم البني ادم اللي جانبي لاقيته اختفي!!!!! مالهوش اثر !!! طيب ازاي؟؟؟؟ ده انا و هو بس اللي كنا في الشارع... خرجوا الناس من اون ذا رن بيجروا علي الحادثة و انا كنت لوحدي و هو مالهوش اي اثر !!!! كملت طريقي للبييت مستغرب و عمال افكر... و صوته لسه شغال في ودني كل لما اسال نفسي سؤال اسمع صوته بيرد ابص حوالي مالقهوش...
رجعت البيت دخلت اخد شاور .. ببص في المرايه.. لاقيته قدامي.. واتاريه معايا في كل الوقت و كل مكان و كل زمان.. موجود معايا و جوايا.... وانا مش حاسس.