حاجة غريبة حصلتلي في حفلة من الحفلات اللي كنت بروحها ما اخدتش بالي منها غير دلوقتي لما ركزت شوية كدا و هديت و نضفت دماغي من الحاجات اللي فيها.. كنت دايما لما بروح علي جارسون عشان اخد منه مشروب من المشاريب اللي بيشلها و يفضل يلف بيها .. دايما واحد تاني بيسبقني و ياخدها... الموضوع ده حصلي كتير قوي !!! لك ان تتخيل اني بفضل اركز مع الجارسون من اول مايحمل الكاسات علي الصينية لحد مايخرج من البوفييه . اقوم مراقبة و متتبعه لحد ما اوصله من اقرب مسافة و الناس كلها بتاخد منه و ادعي ربنا اني الحق علي الاقل اخر كاس .. و فعلا بقرب منه ... و قلبي بينشرح .. و ببقى فرحان .. ايه ده .. حلمي هايتحقق و هاخد الكاس و هاشرب المشروب .. ايدي بتقرب من الكاس .. بدأت احس طعم المشروب.. و فجأة ... تظهر ايد واحد تاني يخطف الكاس من تحت ايدي... علي طول يجيلي احباط لحظي و ابدأ ادور علي جرسون تاني .. و تبدأ العملية من جديد .. اراقب الجرسون .. احاول اوصله من اقرب اقرب مسافة و الناس كلها بتاخد منه و ادعي ربنا اني الحق علي الاقل اخر كاس .. و فعلا بقرب منه ... و قلبي بينشرح .. و ببقى فرحان .. واول لما امد ايدي برده يطلع واحد ياخد مني الكاس.. بصراحة اكتئبت اكتر و قلت اروح اقعد بعيد و اسيب حكاية الكاس دي.. مش عايز اشرب المشروب .. بناقص مشروب .. بس الموضوع ده اتكرر برده في صينية الجاتوه ... بصراحة جالي شك و نظرية المؤامرة هنا طفحت ان حد قاصدها معايا ولا انا معمولي عمل... وقلت خلاص مش هاحط في بالي..
و انا ماشي بالصدفة البحته .. عدى من قدامي جرسون و الصينية فيها كاس و بيقرب مني مش انا اللي رايحله .. و عمال يقرب.. و يقرب.. مديت ايدي .. واقعدت اتلفت حواليا مالقيتش حد .. و اخيرا مسكت الكاس بإيدي .. فرحت قوي... و اتأكدت اني مش معمولي عمل ولا حاجة ولا نظرية مؤامرة ولا حاجة .. فضلت ابص للكاس يمكن انا بحلم..ز ابص و اعاكسه و اقله شعر و غزل و ابوسه كمان و بستغرب الكاس ده حلم؟ .. لا لا لا .. الكاس فعلا في ايدي .. و بدأت احط الكاس علي بقي .. والمفاجأة.......طلع الكاس فاضي .. قعدت فترة مش قادر استوعب... طيب يمكن الكاس اندلأ مني؟؟!!! يمكن ماخدتش بالي و شربته و مش حاسس؟؟؟ لاء الكاس فاضي فعلا...... حكيت لصاحبي الموضوع قالي : يابني انت مكبر الموضوع ليه؟؟؟ كاس و خلاص هاتلاقي غيره كتييير.... و بس
